Железничката мрежа Starline ќе поврзе 39 градови во Европа

Истражувачката и аналитичката институција 21st Europe неодамна претстави проект за железничка мрежа која би требало да поврзе 39 дестинации во европските земји – со линии кои стигнуваат и до Велика Британија, Турција и Украина и со станици во Белград, Загреб и Сараево.

Иако десетици железнички линии што беа пуштени во последниве години го олеснуваат патувањето преку границите на европските земји, новонајавениот предлог на овој „think tank“ со седиште во Копенхаген има многу поамбициозен план за железничките врски на стариот континент.

Нацртот 21st Europe предвидува европска железничка мрежа за возови со големи брзини која би функционирала како метро или систем на метроа. Наречен Starline, проектот треба да ја трансформира европската „фрагментирана, невоедначена, често бавна“ железничка инфраструктура и да воведе ултра брзи врски кои би парирале на воздушниот сообраќај.

Во основа на Starline е предлогот за единствена железничка мрежа изградена на постојната и идна инфраструктура, со приоритет даден на патувања пократки од три часа, правејќи ги рутите како онаа од Берлин до Варшава или од Милано до Минхен конкурентни на воздушниот сообраќај.

Дополнително, 21st Europe предлага целосно преиспитување на искуството, од поедноставен систем за дигитални билети до нови брзи транзитни центри и силен визуелен идентитет со синиот дизајн на возовите.

„Вистински интегриран железнички систем повеќе не е само прашање на погодност, тој е стратешка неопходност за отпорноста на Европа во 21-от век“, наведуваат од истражувачкиот центар. „Дизајниран како метро систем, [Starline] го менува начинот на кој Европејците го доживуваат сопствениот континент – не како збир на оддалечни главни градови, туку како единствена мрежа која брзо се движи, каде што секоја врска, без разлика дали е за луѓе или стоки, е на дофат на рака“.

Темно сината надворешност на возот, развиена како дел од кохезивен визуелен систем, има за цел да воспостави јасен и конзистентен идентитет преку границите.

Наместо да функционираат исклучиво како брендирање, бојата и формата се дел од поширок просторен и инфраструктурен пристап, позиционирајќи го самиот воз како архитектонски елемент во движење.

Проектот дава приоритет на читливоста, препознатливоста и чувството на континуитет, одразувајќи ја амбицијата инфраструктурата за мобилност да се третира како практична и граѓанска.

Се проценува дека новиот систем ќе биде за 30 отсто побрз од патниот и сегашниот железнички сообраќај, при што возовите ќе се движат со брзина од 300 до 400 километри на час.

Поделена на пет линии, мрежата долга 22.000 километри има за цел да поврзе 39 дестинации во европските земји – стигнувајќи до Велика Британија, Турција и Украина.

Ова значи дека патниците би можеле да стигнат од Хелсинки до Берлин за нешто повеќе од пет часа наместо целодневно патување кое е потребно во моментов.

Кога станува збор за регионот, Starline би требало да има станица во Белград на релација Мадрид-Истанбул, додека Загреб и Сараево ќе бидат на линијата Лисабон-Киев.

Вагоните нема да бидат поделени по класи, туку по простори за различни потреби, како што се мирни зони за работни и семејни делови. Возовите ќе пристигнуваат на нови станици изградени надвор од поголемите градови, со врски со постоечките системи на градски превоз.

Од 21st Europe ги предвидуваат овие станици како културни центри кои ќе имаат ресторани, малопродажба и добро проектирани чекални, како и концертни сали, музеи, спортски објекти и простори за различни настани.

Во овој истражувачки центар веруваат дека Starline може да стане реалност до крајот на векот: „Сега почнуваме да градиме мрежа за да поттикнеме вистински промени, здружувајќи ги креаторите на политики, проектантите и лидерите во индустријата за да ја претвориме визијата во акција“, велат 21st Europe.