Иконата на современиот дизајн фотелја TOGO има нова верзија

Salone del Mobile 2026 во Милано заврши, но остави мноштво дизајнерски идеи, иновации и инспирации.

Togo фотелјата е парче мебел за ентериер, достојно за внимание и дневна соба.

Во простор каде што модата повеќе не е ограничена само на облека, туку го обликува начинот на живот, BOSS и Ligne Roset претставуваат соработка што ги брише границите помеѓу ентериерот и гардеробата. Во центарот на оваа приказна се наоѓа иконата на современиот дизајн: фотелјата Togo, парче што од 1973 година го редефинираше концептот на удобност и стана синоним за лежерен модернизам. Во новата интерпретација, Togo добива нов слој на значење; овој пат значењето доаѓа од светот на кроењето, прецизноста и дисциплината на куќата BOSS.

Резултатот е BOSS | LIGNE ROSET Togo: предмет кој изгледа како да е за облекување. Комбинацијата од робусна, висококвалитетна кожа и мека текстилна површина, заедно со контрастни шевови инспирирани од естетиката на кроење на BOSS, создава дијалог помеѓу структурата и мекоста, помеѓу архитектурата и тактилноста. Оваа реинтерпретација не само што го менува изгледот на иконата, туку и нејзината перцепција. Togo станува место кое поканува на опуштање, но и набљудување; на удобност, но и на свеста за формата. Неговата препознатлива силуета останува, но сега делува „за облекување“, речиси couture, како секој набор да е дел од внимателно кроено одело. „Сакавме да го пренесеме чувството made-to-measure во домот, каде што удобноста, изработката и современата елеганција се среќаваат во еден објект“, вели Marco Falcioni, креативен директор на HUGO BOSS.

Од друга страна, Ligne Roset ја продолжува својата долгогодишна приказна за иновација која не се откажува од традицијата. Togo, првично изработен во Франција и рачно обликуван до најситниот набор, останува верен на својата филозофија: слобода на формата без компромис во удобноста. Токму оваа комбинација од слобода и прецизност го прави идеално платно за оваа нова интерпретација.

Во BOSS | LIGNE ROSET верзијата, материјалите стануваат јазик. Кожата и текстилот не стојат во контраст, туку во дијалог. Шевовите не се само детаљ, туку линија што поврзува два света, оној на модното ателје и оној на дизајнот на ентериер. Сè е промислено, луксузно, но без потреба за демонстрација, токму во духот на тивок луксуз. Она што ја прави оваа соработка особено релевантна во контекст на современиот животен стил е фактот што нуди не само предмет, туку и атмосфера. Togo станува сценографија на секојдневието; место за разговор, одмор, читање или едноставно тишина. Парче кое не доминира во просторот, туку го дефинира преку своето присуство.

Внимателно одбрани ВООЅ додатоци го надополнуваат дизајнот на фотелјата Togo: двобојните перници и ќебето со рачно изработени шевови ја одразуваат играта на материјалите. Парчињата облека и lifestyle од колекцијата пролет/лето 2026, како што се чантата Madison и патиките Gary, избрани се за да ја следат комбинацијата од кожа и ткаенина. Беж платнени патики со кожни детали одразуваат тонална софистицираност, додека платнена патна торба со кожни детали и лого ја заокружуваат целината.

И можеби затоа оваа реинтерпретација на една икона не делува како нова верзија на производ, туку како нова дефиниција за дом. BOSS | LIGNE ROSET Togo е достапна од април 2026 година како ограничена дизајнерска серија во одбрани продавници на Ligne Roset, како и во продавниците на BOSS во Париз и Милано.