Научна конференција за аерозагадување во Тетово

На Универзитетот на Југоисточна Европа во Тетово, на 30.10.2017, во организација на НВО Еко Свест од Скопје, ќе се  одржи втората по ред научна конференција на тема аерозагадување. „Аерозагадувањето е директно поврзано со климатските промени кои се причина за екстремните временски услови со кои е соочен светот. Токсичните материи во воздухот се водечка причина за климатските промени. На глобално ниво, аерозагадувањето е причина за 36% смртни случаи од рак на белите дробови, 34% смртни случаи од инфаркти, 27% смртни случаи од срцеви заболувања.

Жителите на градовите во нашата земја дишат загаден воздух и секојдневно се изложени на сите опасности кои ги носи загадениот воздух“ велат од Еко Свест во поканата за настанот, чие присуство е бесплатно и отворено за јавноста.

Конференцијата е дел од проектот “City Tree за заштита на климата”, спроведуван од Еко-свест и финансиски поддржан од Амбасадата на Сојузна Република Германија во Скопје.