Првиот фитнес парк во Штип во завршна фаза

Од вчера, поставени се справите и реквизитите во првиот фитнес парк кој заеднички го прават Општина Штип и Агенцијата за млади и спорт.

Вредноста на проектот е над 25.000 евра а средствата се обезбедени преку Агенцијата за млади и спорт.

„Обврска на Општината и ЈП Стипион е да го уреди просторот околу фитнес паркот, а во следна фаза предвидена е конструкција на скејт парк и кошаркарско игралиште“, изјави Драган Ристов, Советник за односи со јавност.

Фитнес паркот се наоѓа до пешачката патека зад Исарот која беше конструирана во 2014 година. Овој дел од патеката е предвидено да биде соодветна спортско-рекреативна зона.