Зад овој симбол на Бразил стои приказна вредна како олимписки медал

Статуата на Христос Спасителот, симболот на Рио де Жанеиро, градот домаќин на овогодишните ЛОИ, се издига на 700 метри над плажата на планината Корковадо и крие приказна која вреди како олимписки медал.

Инспирирана од јакнењето на христијанството во Бразил, кој на крајот на 19 век станува република, статуата висока дури 38 метри е дизајнирана, проектирана и изградена од страна на голем тим инженери, архитекти и скулптори.

Идејата за изградба на ваков споменик датира уште од далечната 1850 година, кога еден локален свештеник предложил поставување на христијанско обележје на Корковадо, и за тоа побарал средства од бразилската принцеза Изабела, која не била оптимист по прашањето на предлогот. Во времето кога Бразил станува република, односно во 1889 година, идејата била потполно занемарена.

Проектот воскреснува по Првата светска војна, кога група Бразилци вклучувајќи ја и Римокатоличката надбискупија во Рио, во страв поради недостатокот на вера меѓу народот, настојува да изгради симбол на христијанството. Планината Корковадо е избрана како локација првенствено поради својата височина и можноста споменикот да се гледа од секој дел на градот.

На конкурсот за дизајн објавен во 1922 година, победил бразилскиот архитект Еитор да Силва Коста (Heitor da Silva Costa). Но, иако истата година бил подигнат камен-темелникот, наскоро се појавиле првите проблеми во изведбата. Со цел да реши некои свои дилеми, Силва Коста оди во Европа во 1924 година, каде што добил извонредна стручна помош од францускиот инженер Алберт Како, стручњак за армиран бетон, но исто така, се консултирал и со многу вајари и архитекти мајстори на својот занает.

Статуата е отворена за посетители на 12 октомври 1931 година, а импозантната височина од 38 метри ја вклучува и височината на постолјето од осум метри. Цената за изградба на споменикот е еквивалентна на денешни 3,4 милиони американски долари. Се вбројува меѓу новите седум светски чуда.