Темен дизајн на дом со софистициран акцент на бои

Дизајнерите на ентериери, најчесто, при своите дизајни за одредени простори ги анализираат профилите на луѓето што ќе бидат корисници на овие простори, нивните желби и потреби, па така според овие анализи и ги поставуваат основните начела на нивните дизајни.

Ентериерите каде темната основа на површините е доминантна, најчесто се наменети за корисници кои не сакаат нападни и светли бои и тонови во својот дом и сакаат после напорниот работен ден да ги „одморат“ своите очи во затемнета атмосфера.

Принципите на овој ентериер се базирани врз начелата на ентериерите со темна основа, но истовремено става и акцент на колорит кој му дава доза на свежина, динамика, разиграност и слично.

Како главен колоритен акцент во дневниот простор се јавува седечката гарнитура заедно со тепихот, каде посветлите и потемните тонови на виолетова боја ни даваат топлина, свежина и длабочина на овој простор.

Исто така, значаен колоритно – освежувачки елемент е вметнувањето на свежо зеленило во дневниот простор, кое истовремено ја вметнува и природата во просторот.