Скулптури на површина од два милиметри

Дека уметноста е насекаде околу нас, и дека е можно врвни дела да се создадат дури и на врвот на графитен молив, докажува веќе со години Јасенко Ѓорѓевиќ од Тузла, БиХ.

Неговите минијатурни скулптури го привлекуваат вниманието и на светската јавност, а овие денови под лупа на јавноста се најде неговата минијатура посветена на тригодишното дете Аjлан Курди, кое се удави на Медитеранот во обид со своето семејство да се засолни во Европа. Во последниот период тој највеќе е посветен на ваквите скулптури со порака.

Свесен е дека неговата работа не може ништо да смени, но вели дека  многу е важно за проблемите и состојбите постојано да се зборува. Ѓорѓевиќ донекаде успеал во тоа, бидејќи бројни светски медиуми ги објавиле неговите фотографии на минијатурната скулптура посветена на малиот Аjлан.

За изработка на една минијатура Ѓорѓевиќ вели дека му се потребни 5-10 часа активна работа, само за добивање на првичен груб облик, а уште дополнителни неколку денови за сите детали.