Што ќе смени изборот на Доналд Трамп во енергетиката?

Изборот на Доналд Трамп за нов американски претседател, веројатно вознемири многумина од аспект на политиките и ставовите што ги заговараше во својата кампања. Сепак, извесно е дека неговата енергетска политика дури сега треба да биде креирана. Дека многу прашања сè уште се отворени, покажува и фактот што ниту цената на нафтата не се зголеми драматично по неговата победа. За разлика од Клинтон, чија кампања беше многу детална од аспект на енергетските прашања,

Трамп ретко се осврнуваше на оваа тема и никогаш не навлезе во детали. Но, како што сега стојат работите, речиси е извесно дека тој сака да го сруши планот на Обама „Clean Power Plan“, кој подразбираше постепено затворање на централите на јаглен.

Беше очигледно дека Трамп е најмалку загрижен за климатските промени во споредба со другите кандидати, па најверојатно тој ќе биде фокусиран на бизнисот и фосилните горива, наместо на чистите технологии.

Но, сепак, познавачите на законите во оваа земја укажуваат на фактот што американскиот Устав во многу подрачја му дава право на претседателот главно да уверува, но не и да носи одлуки самостојно, така што околу енергетските теми ќе му биде потребна силна поддршка од Конгресот. Имајќи предвид дека за промена на курсот во однос на јагленот ќе биде потребно и менување на некои закони, сепак може да се заклучи дека администрацијата на Трамп ќе може да ветува револуција во енергетската политика, како впрочем и во други обасти, но во реалноста ќе се случуваат многу повеќе компромиси отколку што на прв поглед изгледа.