Сеизмичко тестирање на висококатниците во Аеродром

Симулација на вештачки  земјотрес со магнитуда од четири степени денеска беше предизвикан на највисоките згради во Македонија во комплексот „Скај Сити“ во Општина Аеродром  на  компанијата „Џеваир Македонија“.

Директорот на Институтот за земјотресно инжинерство и инжинерска сеизмологија Михаил Гаревски рече дека со принудни вибрации на 40 кат побудена е торзионата вибрација која, како што рече, ако се случи некој катастрофален земјотрес во Скопје токму оваа тонова форма би била побудена.

– Се покажа дека објектот е континуиран и одговорите беа еластични. Практично зградата и понатаму ќе ја тестираме на околу 400 мерни точки по што ќе знаеме точно како објектот се однесува, истакна Гаревски.

Појасни дека јачината  побудена со вибрациите помеѓу 4 и 5 степени е појака од чувството на вистински земјотрес со тие степени.

– Ваквите тестирања се важни за да се калибрира и провери математичкиот модел. Денеска иако математичките модели се перфектни, сепак реалните тестови покажуваат дали зградата се однесува како што е предвидена со математичките модели, рече Гаревски.

Со тестирањето се испитуваат динамичките карактеристики на зградите што претставуваат нивна лична карта за безбедност посебно во услови на земјотрес. Ваков тип на испитување е вршено и на трансамерика пирамидата во Сан Франциско.