Самостојна изложба на Јован Шумковски во Ровињ

Самостојна изложба на ликовниот уметник Јован Шумковски насловена „Прва плоча” денеска ќе биде отворена во Мултимедијалниот центар (ММЦ) во Ровињ.

Според кураторот на изложбата Викторија Васева-Димеска, поставката е ретроактивен пресек на творештвото на Шумковски во последните 15 години составено од неколку целини – фотографии, инсталации, објекти, видео.

– Проектот се темели врз имагинативната спекулација базирана на сеќавањето на оние реалитети кои го прават рекапитуларот на неговите реакции на битните пунктови, ситуации и случувања во неговиот животен простор. На релација блиско минато – сегашност, Шумковски го актуелизира минатото, ја регистрира сегашноста и ја антиципира иднината во проектирање на илузијата во која живееме со цинично манипулирање на граничната линија на времето и просторот, вели за изложбата Васева-Димеска

Во присуство на авторот, изложбата ќе ја отвори заменик градоначалникот на Ровињ, Марино Будичин, и директорката на ММЦ, Дубравка Светличиќ.