Почна изградбата на првата руска црква во Македонија

Во општина Аеродром, спроти спортскиот центар „Јане Сандански“, денеска беше поставен камен – темелник за изградба на црква посветена на „Св. Троица“.

Ктитор на новата црква е рускиот бизнисмен и сопственик на спортскиот клуб „Вардар“ Сергеј Самсоненко, а осветувањето го изврши архиепископот охридски и македонски г.г. Стефан.

Изградбата на првиот руски православен храм во Македонија, според г.г. Стефан, ќе влезе и ќе се забележи не само во историјата на Македонската православна црква, туку и во историјата на руско-македонското пријателство.

– Веруваме дека ќе биде храм-мост, кој уште повеќе ќе ги зближи нашите братски народи и сестрински цркви и ќе биде дел руска душа на македонската земја, – рече г.г. Стефан.

Самсоненко подвлече дека изградбата на руски православен храм во Македонија е вистинска работа да ги спои нашите народи, бидејќи, како што забележа, има голема духовна блискост.

Црквата посветена на „Св. Троица“, треба да биде готова во 2015 година, а изведувач на работите е компанијата „Жикол“.