Отворен е новиот патнички терминал на загребскиот аеродром

Во вторникот беше свечено отворен новиот патнички терминал на загребскиот аеродром „Фрањо Туѓман“ (од неодамна новото име за аеродромот „Плесо“), кој е проектиран за пет милиони патници годишно во првата фаза, со можност за зголемување до осум милиони.

Во проектот се вложени скоро 300 милиони евра. Преку новиот терминал, на полноќ на 28 март ќе се префрлат сите операции од стариот терминал, а истиот ден рано наутро тргнува и првиот редовен лет на Croatia Airlines, Загреб – Дубровник.

Новиот терминал има површина од 65.000 квадратни метри на четири нивоа со брановиден покрив, содржи 30 шалтери за чекирање и девет линии за сигурносни проверки на патниците, осум мостови за авиони, 1000 паркинг места, мноштво угостителски содржини и продавници. Терминалот е граден во период од три години, во најголем дел од домашни компании, пренесува „Hina“.