Колоритен ентериер на мансарда во стариот дел на Будимпешта

Стариот стан кој поминал низ голема трансформација, се наоѓа во срцето на Будимпешта. Поради својата локација, нуди фантастичен поглед на некои од обележјата на унгарскиот главен град, како што е Парламентот на Дунав.

Задачата на архитектите од Margeza Design Studio била погледот максимално да се искористи, а  напуштениот стан да дише нов живот.

Зелениот ѕид, стаклените ногарки на клупата, жолтиот мебел и тепих во облик на Будимпешта се главните детали за дневната соба.

Архитектите Маргит и Геза од бирото сместиле во овој стан неколку дизајнерски детали, кои го прават ентериериот крајно необичен и интересен.

Пред се, тука  е впечатливиот и освежувачки колорит, живописните детали, како и големите прозорци кои покрај добриот поглед, овозможуваат многу светлина во поткровјето.

Еден од најинтересните детали се крие на подот. Имено, таму е поставен рачно изработен тепих во форма на Будимпешта со црвена точка која покажува позицијата на апартманот.

Дневната соба, покрај жолтата фотелја и необичните подни ламби, го краси и живиот зелен ѕид во ентериерот.

Белиот ентериер со живописните бои во детали дополнителн е збогатена со уште еден материјал – стакло. Ако подобро се загледате во фотографиите, ќе забележите дека клупата до прозорецот стои на стаклени ногарки, додека покрај софата е поставено полукружно стаклено масиче.

На двете нивоа од овој стан од 110 квадратни метри распореден е пространа дневна соба, две спални соби, како и тераса која обезбедува поглед на реката Дунав. Нивоата се поврзани со скалила, додека просторот испод е искористен за складирање на гардеробер од обоен МДФ со висок сјај. Се разбира, во бела боја.