Порта3 – градежништво, архитектура и екологија Порта3 – градежништво, архитектура и екологија
Климатските промени трократно ќе го зголемат ризикот од глобалниот недостиг од храна, а меѓународната заедница треба да се подготви за ценовни шокови за да ги спречи граѓанските немири, се наведува во заедничка американско-британска студија.
Катастрофалните шокови на пазарот на храната, вклучувајќи ги и зголемувањето на цените и нестабилноста на пазарите, до средината на овој век ќе бидат трипати поверојатни отколку што се сметаше досега, објави Работната група за екстремните временски услови и отпорноста на глобалниот прехранбен систем.
Бидејќи светската популација до 2050 година ќе се зголеми на 9 милијарди луѓе, производството на храна треба да се зголеми за 60 отсто, со цел да се спречат граѓанските безредија поради недостигот од храна предизвикан од климатските промени.
„Климата се менува и климатските рекорди се уриваат речиси секојдневно. Ризиците од климатската катастрофа се сé поголем, а таквиот развој на настаните би можел според својот обем да биде досега без преседан“, напиша во извештајот Дејвид Кинг, специјалниот советник за климатските промени во британското министерство за надворешни работи.
Глобализацијата и новите технологии придонеле за ефикасноста на глобалниот прехранбен систем, меѓутоа тие го направиле и многу поранлив кога станува збор за ризиците, смета Кинг.
Во извештајот, исто така, се истакнува дека меѓу најголемите ризици се зголемувањата на цените на нафтата кое би довело до зголемување на цената на храната, потоа намалените извозни капацитети на Бразил, САД и регионот околу Црното Море поради слабоста на инфраструктурата, како и падот на вредноста на американскиот долар, што, исто така, би поттикнало зголемување на цените на храната на глобалниот пазар.
Екстремните временски услови најмногу би можеле да влијаат врз производството на храната во Северна и во Јужна Америка, како и во Азија, на континентите на коишто се однесува најголемиот дел од производството на четирите главни житарки – пченката, пченицата, оризот и сојата.
