Етиопија ја доби првата трамвајска линија

Властите во главниот град на Етиопија, Адис Абеба неодамна ја пуштија во сообраќај првата трамвајска линија не само во таа земја туку и во цела Субсахарска Африка. Воведувањето на трамвај е проект што во голема мера е финансиран од Кина, што се смета за важен чекор на соработка. Двете трамвајски линии долги 34 километри и со капацитет од 60.000 патници дневно, ги изгради Кинеската железничка градежна компанија (China Railway Engineering Corporation). Вредноста на инвестицијата е 475 милиони долари од кои 85% се финансирани од страна на кинеската „Ексим банка“.

Трамвајскиот превоз го субвенционира државата, а цената на  билетите, во зависност од должината на  патувањето, изнесува од 0,08 до 0,25 евра.

Трамваите за кои шините и останата опрема се поставувани три години, ќе го олесни превозот на  петте милиони жители на  Адис Абеба кои досега користеле застарени и лошо одржувани автобуси и комбиња.

Во текот на последната предизборна кампања, во мај оваа година, државната власт повторуваше дека   трамвајот е  „симбол на модернизацијата и симбол на нова Етиопија“.

Владата во Етиопија се потпира на Кина и во врска  со други големи проекти: железница, автопати, хидроцентрали и сл.